بھارت کی آبی جارحیت: دریائے جہلم میں 22 ہزار کیوسک پانی چھوڑ دیا

اسلام آباد: بھارت نے آبی جارحیت کرتے ہوئے مقبوضہ کشمیر میں ڈیم کے اسپل ویز کھول دیے، جس کے نتیجے میں دریائے جہلم میں 22 ہزار کیوسک پانی کا ریلا داخل ہوگیا ہے۔

ڈائریکٹر ایس ڈی ایم اے کے مطابق پانی کا یہ ریلا دریائے جہلم کے دو میل کے مقام پر گزر رہا ہے، جس سے درمیانے درجے کے سیلاب کا خدشہ پیدا ہوگیا ہے۔ شہریوں کو ہدایت کی گئی ہے کہ دریا کے قریب جانے سے گریز کریں۔

ذرائع کے مطابق پانی چھوڑنے کا یہ اقدام مقبوضہ کشمیر کے پہلگام میں سیاحوں پر حملے کے بعد سامنے آیا، جس کے بعد بھارت نے سندھ طاس معاہدہ معطل کرنے سمیت دیگر سخت اقدامات کا اعلان کیا تھا۔

یاد رہے کہ سندھ طاس معاہدہ پاکستان اور بھارت کے درمیان وہ واحد معاہدہ ہے جو جنگوں، کشیدگی اور بحرانوں کے باوجود قائم رہا ہے، اور عالمی سطح پر ایک کامیاب آبی معاہدے کے طور پر جانا جاتا ہے۔

پاکستان کی قومی سلامتی کمیٹی نے بھارتی اقدامات کے جواب میں بین الاقوامی قانون کے تحت جوابی اقدامات کا اعلان کیا ہے۔